Хүй мандлын торгон дэвжээнд хүч сорьж байгаа бөхчүүд хоёрын даваанд бяр шавхсан, ухаан уралдуулсан олон сайхан барилдааныг үзүүлэв. Энэ даваанд улсын арслан Д.Азжаргал нэгийн даваанд улсын начин Ц.Сумъяабэйсийг давсан аймгийн начин Э.Өлзийсайхан/Хөвсгөл/-д, улсын гарьд М.Баяржавхлан өмнөх даваанд улсын начин Н.Бүрэнбаатарыг давсан аймгийн начин Б.Алтангэрэл/Увс/-д, улсын гарьд Ж.Бат-Эрдэнэ аймгийн начин Б.Баатарболд/Сэлэнгэ/-д, улсын заан Т.Санчир аймгийн начин О.Очбат/Ховд/-д, улсын заан Б.Соронзонболд аймгийн начин Т.Мөнх-Эрдэнэ/Увс/-д, улсын харцага Т.Баасанхүү аймгийн харцага Б.Өлзийсайхан/Өвөрхангай/-д өвдөг шороодов. ХаринИ.Ёндонсамбуу, Ц.Цогтжаргал, Л.Цэрэнтогтох, Б.Заяамандах, М.Эрдэнэбат, Б.Сумъяа, Ж.Чулуунбат, А.Алтанхуяг, Б.Батжаргал, Д.Энхбаяр, Э.Даш, Ц.Чимэддорж, Э.Ванданцэрэн, Б.Хишигбаатар, Б.Серик, Ж.Дагва-Очир, Д.Амаржаргал, Д.Цэрэнтогтох, Н.Мустафа, Б.Эрдэнэхүү, А.Давааням нарын 21 улсын начин цолтон энэ даваанд бүдрэв. Хоёрын давааны яг нугалаан дээр таарсан аймгийн арслангуудын гал гарсан барилдаанд Баян-Өлгийн Э.Тамираа давж, Төвийн Ж.Батбилэг унажээ.